طريقة سهلة قوي للسمك البلطي وفي نفس الوقت مقرمش ولذيذ

طريقة سهلة قوي للسمك البلطي وفي نفس الوقت مقرمش ولذيذ

والطريقة دي برضه والخلطة بتاعتها تنفع لأي سمك مقلي تاني وخصوصا سمك المكرونة والمرجان والسبيط


طبعا السمك البلطي تجيبيه وتنضفيه بالملح والدقيق والخل


وبعدين تعملي التتبيلة بتاعته
عبارة عن توم مبشور وفلفل رومي مبشور وملح وكمون كتير وعصير ليمون
تحشي كل سمكة بالتتبيلة دي كويس
وبعدين تحطي السمك في كيس بلاستيك كبير زي كده

الكيس البلاستيك ده مهمته انك لما تحطي السمك في التلاجة لغاية مايشرب التتبيلة مايعملش ريحة في التلاجة بتاعتك وكمان هتقدري كل شوية تقلبي الكيس علشان السمك يختلط كويس بالتتبيلة من غير ماتبوظي ايدك
كل نص ساعة كده اقلبي الكيس على جنب من الجوانب
سيبي السمك في التتبيلة على الاقل ساعتين ياقمر(وممكن من قبليها بيوم)
وبعدين طلعيه من التلاجة وابتدي حطي كل سمكة في الدقيق

وتقلبيها كويس في الدقيق لغاية ماتتغطى كويس بيه زي كده

امسكي السمكة بصوابعك كويس من عنيها ونفضي الدقيق الزايد اللي عليها

هاتي البخاخة
وامليها ميه وامسكي السمكة من عنيها بصوابعك زي كده

ورشي عليها مية من البخاخة لغاية ماتحسي ان الدقيق كله اللي على السمكاية اتشرب مية زي كده

لاحظي الفرق بي السمكتين قبل وبعد
ولاحظي ان السمكة شربت المية ومش بتنقط مية نهائي
ملحوظة صغنونة

تكوني بقى محضرة طاسة مجوفة فيها زيت غزير سخن وتنزلي فيه السمكة علطول ياقمر ولو الطاسة بتاخد سمكتين تحطيهم عكس بعض يعني راس جنبها ديل
وتخلي النار عالية وتقلبيهم باستمرار كل شوية على جنب من الجناب لغاية ماتستوي كويس طلعيهم على مناديل المطبخ ورشي على كل سمكة كمون وكسبرة ناشفة بسرعة وهية سخنة


الطريقة دي هتخلي السمك مقرمش والجلد مايتحرقش في الزيت والسمكة بتاخد وقت أطول على النار فتستوي كويس من القلب والتوم كمان اللي جوة مايبقاش طعمه ني .


copy